" />

Continúan á alza os casos activos de covid19 nunha xornada na que descenden lixeiramente os contaxios

A covid non da tregua na provincia e achégase perigosamente ás 300 infeccións activas, unha cifra que non se daba na provincia dende o mes de marzo, cando se saía da terceira vaga. E malia que nas últimas horas detectaronse menos positivos que na xornada anterior o certo é que as altas médicas chegan aos seus mínimos co que non axudan a baixar a incidencia do virus. 

En cifras, e segundo o último informe do SERGAS con datos recollidos ata as 6 da tarde de onte, son en total 284 os casos activos na provincia, unha cifra que, como diciamos, non se daba en Lugo dende o 8 de marzo, cando estaba remitindo esa terceira vaga. 

Pola contra descende o ritmo de contaxios, eso si, moi levemente. Onte o SERGAS rexistrou un total de 27 positivos detectados, fronte aos 34 que se rexistraran o domingo. Pero, contra estes positivos, non loitan as altas médicas das últimas horas. E é que a provincia tan só rexistrou 7 altas. 

No tocante á presión asistencial, a área de Lugo, cervo e Monforte, continúa amosando os mesmos datos. En total 4 ingresados por covid, un deles na UCI do HULA, e os outros tres en unidades convencionais de hospitalización, 2 no Hospital Lucense e un en Monforte de Lemos. 

E esta importante incidencia afecta case na súa totalidade ás cidades de Lugo e Sarria, onde os contaxios non deixan de subir. Na capital da provincia, que suma 88 casos activos, rexistráronse un total de 93 positivos novos nos últimos 14 días, dos que algúns xa se recuperaron; mentres que a incidencia a sete días mantense, todavía, moi alta, en 57 casos. Máis da metade da incidencia a dúas semanas o que podería prever un novo aumento de positivos. 

O mesmo pasa en Sarria, o concello que, porcentualmente, está a arroxar os peores datos, e onde nos últimos 7 días rexistráronse 37 casos novos, máis da metade dos 68 que se rexistran a 14 días. En total, Sarria contaba onte con 64 casos activos.

Pola súa banda, Castroverde, o Concello que segue en nivel medio de restricións podería quedar libre de limitacións esta semana, dado que a súa incidencia, que superaba os 250 casos por cada cen mil habitantes a pasada semana, está xa por baixo dos 50 casos por cada cen mil habitantes a 7 días, co que o Comité Clínico que asesora á Xunta e que se reunirá hoxe, podería aliviar as medidas restritivas neste concello.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo