Baixa o ritmo de contaxios de covid na provincia de Lugo, ao tempo que descende de forma máis que significativa o número de altas médicas. Esto deixa á provincia, de novo, en ascenso no número de casos activos.
Así o revela o último informe do SERGAS con datos recabados ata as 6 da tarde de onte e que cifra en 164 as infeccións activas, 3 máis que na xornada anterior.
E é que malia que reducíronse á metade o número de positivos, que nas últimas horas foron 8 persoas, o certo é que o freo das altas médicas rexistradas nas últimas dúas xornadas está causando esta nova suba de casos.
Así, segundo informou o SERGAS, no día de onte tan só recibiron a alta médica 4 persoas, case igual que na xornada anterior que eran 6 persoas as que se recuperaban tras dar positivo en covid.
Outro baremo que continúa igual un día máis é a presión asistencial.O Hula segue rexistrando 4 pacientes en planta de hospitalización e un na UCI. O resto de hospitais continúan hoxe sen rexistrar casos covid.
E trala reunión, onte, do Comité Clínico que asesora á Xunta nas medidas a tomar en relación coa pandemia, o Executivo Galego tomou a decisión de pasar ao Concello de Castroverde ao nivel medio de restricións logo de se detectar un gromo a pasada fin de semana. Dende a medianoite do vindeiro sábado, entrarán no municipio as novas limitacións mentres que o resto de concellos da provincia continuarán no nivel baixo de restricións. O presidente da Xunta, comparecerá hoxe para expór as medidas acordadas polo comité clínico así como as condicións para a retirada da máscara ao aire libre que o Goberno central anunciou para o vindeiro 26 de xuño.
