Representantes de empresas lucenses desprazáronse a Curitiba, no estado de Paraná, unha das principais rexións agrogandeiras do país, para identificar novas oportunidades comerciais.
Varios empresarios lugueses pecharon en Curitiba, no estado brasileiro de Paraná, unha misión de prospección comercial que os levou a diferentes puntos de Brasil e da República de Paraguai co obxectivo de explorar novas oportunidades de negocio para o sector agroalimentario da provincia.
A actividade de internacionalización foi organizada pola Fundación Agroalimentaria de Galicia (FAGA), no marco da iniciativa «Lugo, valor agroalimentario».
A delegación empresarial, encabezada polo secretario xeral da Confederación de Empresarios de Lugo (CEL) e presidente da Cámara de Lugo, Jaime López, e polo presidente de FAGA, Carlos Cebrián, desenvolveu en Brasil unha axenda de traballo que incluíu encontros institucionais, reunións técnicas coa Universidade Federal de Paraná e visitas a explotacións agrogandeiras.
Entre as principais actividades destacou a reunión mantida con representantes e técnicos da Federación das Industrias do Estado de Paraná (FIEP), no seu Centro Internacional de Negocios. A delegación foi recibida por Caroline Pinheiro, coordinadora do Centro; Naschelli Pacheco, xerente de Relacións Internacionais; Mari Aparecida, economista e xerente de Desenvolvemento Económico e Social; e Rosângela Veloso, analista.
Durante o encontro, que se prolongou varias horas, abordáronse posibles vías de colaboración para facilitar a entrada dos produtos lucenses no mercado brasileiro, mediante a identificación de potenciais provedores, distribuidores e clientes, así como de socios industriais e operadores loxísticos.
A axenda incluíu tamén reunións con técnicos e representantes da Federación da Agricultura do Estado de Paraná (FAEP), ademais de visitas a explotacións gandeiras para coñecer de primeira man a realidade produtiva da rexión.
Universidade e innovación tecnolóxica
A misión empresarial incorporou, así mesmo, encontros técnicos coa Universidade Federal de Paraná para avanzar no desenvolvemento dun proxecto de cooperación tecnolóxica internacional.
No proxecto están implicadas a Universidade Federal de Paraná, a Universidade Autónoma de Barcelona e empresas lucenses como Innogando e Medrar Smart Solutions.
O proxecto céntrase no desenvolvemento dun dispositivo tecnolóxico de baixo custo que permita monitorizar a posición dos animais, identificando se permanecen deitados ou levantados. Esta solución busca obter datos precisos sobre diferentes comportamentos, como os relacionados coa nutrición ou o estrés por calor, achegando información de alto valor para a xestión das explotacións gandeiras e a toma de decisións.
Nesta fase do proxecto de investigación e desenvolvemento, orientado á implementación de solucións TIC para a gandería de precisión, xa se están instalando os dispositivos nas explotacións aquí. A implantación nas granxas brasileiras está prevista para os próximos meses.
A actividade desenvolvida en Brasil e Paraguai supón un novo paso na estratexia de internacionalización do sector agroalimentario lucense, favorecendo a identificación de oportunidades comerciais e o establecemento de relacións de cooperación empresarial e tecnolóxica con mercados internacionais.
