Unha discusión entre unha parella acabou con eles dous detidos e tres policías feridos. Este foi o resultado dunha pelexa que tivo lugar o pasado domingo nun edificio da rúa Magnolia, ao que unha patrulla da Unidade Territorial de Policía de Barrio da Policía Local se achegou despois de recibir un aviso da Sala do 092.
Xa no lugar os axentes entrevistaron á muller, que presentaba unha ferida na man e sangue na boca. Ela explicoulles que discutira coa súa parella por chegar tarde á casa en “malas condicións”. A policía tamén falou co home, que declarou que el tamén fora agredido posto que ela lle propinara varias puñadas no peito.
A policía procedeu á detención do home por violencia de xénero, pero nese momento ámbolos dous cruzáronse e voltaron a discutir violentamente. Os axentes tiveron que separalos, o que resultou en varias feridas leves para tres deles. Despois deste momento de tensión, a muller tamén foi detida por un delito de violencia doméstica e por atentado contra a autoridade.
A parella foi trasladada a dependencias policiais, onde se lles instruíron dilixencias para o Xulgado pertinente.
