Esta tarde a asociación Lugo Monumental axudou a San Vicente, titular da fonte da Praza do Campo, a obrar o seu “milagre” e facer que os tres canos da popular escultura manen viño, tamén posible grazas ao patrocinio da adega Val de Quiroga. A Alcaldesa Lara Méndez, asistiu á Praza do Campo nun xesto de cercanía cara á veciñanza lucense e aos colectivos organizadores do evento.
Este acto, sinxelo pero vistoso, recupera a súa popularidade despois de que Lugo Monumental rescatase unha bela tradición que ameazaba con desaparecer para sempre ao suspenderse a súa celebración durante máis dunha década. En 2014 volveuse a levar a cabo e esperamos que este segundo ano marque unha continuidade no tempo.
Participou no acto o orfeón Xoán Montes, que amenizou coas súas voces o evento, e no mesmo acto fíxose entrega dunha placa e distintivo a Dona Amparo Yáñez do Restaurante Campos, e tamén se outorgou o título de Socia de Honra de Lugo Monumental á soprano Noemi Mazoy. Recoñécense así, a traxectoria de Dona Amparo, e a constante colaboración que Noemi Mazoy desenvolveu con esta Asociación dende hai xa anos.
