Foto PlenoOs concelleiros de Lugonovo deron o visto e prace á subrogación dos antigos traballadores da ORA pero pecharon todas as portas á posibilidade de que Vendex se postulase, unha vez máis, como candidata ao contrato ponte “que volvería a poñer en funcionamento o sistema”.
“Estas son as dúbidas que non resolveu a proposta do goberno – sinala o portavoz do Grupo Municipal, Santiago Fernández Rocha – e que determinaron a nosa abstención durante a votación. As manobras erradas do executivo dende que iniciou as xestións do servizo non fixeron máis que sementar dúbidas sobre a finalidade que perseguía con este proceso”.
En canto ao PXOM, Fernández Rocha apunta o consenso da formación á convocatoria urxente da Comisión de Planeamento e a que sexa no seo dela onde se tomen as decisións adecuadas para abordar tódalas dúbidas que provocou a suspensión do Plan de Vigo. “Nós sempre fomos moi críticos co documento de Lugo porque entendiamos que non se adapta á realidade da nosa cidade e que só favoreceu intereses especulativos, mais cremos tamén que lle corresponde á xustiza pronunciarse firmemente sobre a súa legalidade”.
Por outra banda, Lugonovo quere amosar a súa satisfacción porque durante a sesión desta mañá quedase aprobada por unanimidade a súa proposición para desenvolver varios roteiros que poñan en valor a identidade cultural da cidade. Unha iniciativa encamiñada a desenvolver unha rede de divulgación patrimonial da capital que achegue a veciños e turistas outros capítulos da nosa historia local que ata o de agora no se dinfundiron suficientemente. Para iso, a formación suxeriu, entre outras medidas, a creación dunha sinalética propia dos edificios, monumentos e vías, amparada nas novas tecnoloxías que, mediante, por exemplo, códigos QR remitan ao interesado toda a información relativa a datos de interese deses espazos.
Tamén se posicionou o Partido Popular no tema da ORA e do PXOM. Na proposta da ORA que a alcaldesa trasladou ao Pleno, o líder dos populares, Jaime Castiñeira, dixo que “reflicte o seu novo fracaso, nun pleno máis no que queda patente a incapacidade de diálogo do PSOE, que volve demostrar que Lugo está abocado ao bloqueo pola negativa dos socialistas ao esencial na democracia: conversar cos outros grupos políticos”.
Castiñeira subliñou que “é a terceira vez que leva a pleno, con idéntico resultado de fracaso, un intento por devolverlle o servizo da ORA a Vendex”. “A alcaldesa ten que darnos aos lucenses dúas explicacións: que é o que lle debe a Vendex para insistir tanto nesta cuestión e tamén quen manda no Concello de Lugo, porque dende logo está claro que dá a impresión de que non é a alcaldesa”.
No tocante ao PXOM, Castiñeira declarou que: “a indefinición da alcaldesa co PXOM pon en perigo a Lugo”. O voceiro popular afirmou que “é incrible e inaudito que o goberno municipal non tome medidas nin se aclare, á espera de que veñan outros a resolverlle o seu problema” Castiñeira destaca que “parece que a alcaldesa non se dá conta de que o PXOM de 1990 levaría ao municipio á paralización e aos desenvolvementos máis prexudiciais”.
Réplica de XSG
Xuventudes Socialistas de Galicia emitiu un comunicado no que acusa ao Partido Popular de non apoiar aos traballadores, “preservando o mantemento da estabilidade no emprego, o volume e os dereitos laborais de todas as persoas asalariadas vinculadas á prestación de servizos públicos”. Ao tempo que poñen o punto de inflexión na lexislación “queremos recordarlle á oposición que a lexislación española non resolveucomo facer compatible o principio de estabilidade no emprego do persoal fixo nos procesos de reversión cos de acceso ao emprego público, constitucionalmente protexidos, cubrindo os baleiros mediante unha xurisprudencia cambiante”.
