Este sábado terá lugar a primeira das andainas Mulleres con Forza, unha das actividades que o Concello de Lugo puxo en marcha con motivo da celebración do Día Internacional da Muller, o vindeiro 8 de marzo.
Así, dende Caminos con Arte organizan esta ruta cultural polo centro histórico da cidade onde se percorrerán espazos e monumentos relacionados coas mulleres que transformaron a sociedade lucense e galega ao longo da súa vida, deixando un importnate legado a nivel histórico, cultural ou científico.
As andainas terán lugar todos os sábados de marzo ás 10.00 e as 12.00 horas, saíndo dende os soportais da Casa Consistorial e durarán ao redor dunha hora e media. Dende a organización lembran que é obrigatorio o uso da máscara durante toda a actividade e que se fará con grupos reducidos adaptados á normativa sanitaria que poderían modificarse en función da situación epidemiolóxica.
Para esta actividade é preciso inscribirse, de forma gratuita, no teléfono 010 ou no 982 297350 dende fóra de Lugo.
