O Concello de Castroverde ordenou a paralización dunhas obras na contorna dunha explotación gandeira de Cellán de Mosteiro, despois de que ADEGA-Lugo denunciase a realización de movementos de terras, escavacións e recheos na zona.
A medida municipal permitirá comprobar a legalidade das actuacións e determinar se dispoñen das licenzas e autorizacións necesarias. A paralización ten, polo tanto, carácter preventivo mentres se realizan as inspeccións pertinentes, sen que polo momento se concretase a existencia de infraccións.
Segundo explica a organización ecoloxista, parte das terras extraídas era transportada en camións ata unha parcela próxima na que se estaría ampliando un recheo iniciado en 2024. ADEGA sostén que estes depósitos afectan unha zona húmida onde nacen augas que alimentan un regato conectado co rego do Mosteiro e, posteriormente, co río Tórdea.
A asociación afirma que este espazo conservaba hai anos unha superficie de auga máis extensa e que os sucesivos recheos a reduciron a unha zona de xunqueira. Por este motivo, considera que a suspensión dos traballos é un primeiro paso necesario, pero reclama tamén que se avalíen os danos e, se corresponde, se acometa a restauración ambiental do terreo.
ADEGA solicita igualmente que se revise a situación urbanística e sanitaria da explotación gandeira e da súa ampliación, que, segundo a entidade, elevaría a súa capacidade ata preto de 1.600 xatos de cebo. Tamén pide que se determine se a localización destas instalacións dentro do núcleo de Cellán de Mosteiro cumpre todos os requisitos aplicables.
A organización agarda que o Concello e a Confederación Hidrográfica do Miño-Sil completen as comprobacións e adopten, en función dos seus resultados, as medidas necesarias para protexer o curso de auga e recuperar o espazo afectado.
