O PP acusa ao Goberno Municipal da mala xestión en cultura pola desatención á muralla

O voceiro do Grupo Popular Jaime Castiñeira lamenta que, a dúas semanas da celebración do XV aniversario da muralla como Patrimonio da Humanidade, se descoñeza a programación de actos para celebrar esta efeméride. “Lugo e a Muralla son dúas palabras que para os lucenses van unidas polo que é inadmisible que, ano tras ano, os socialistas non deran os pasos necesarios para promocionar este monumento tal e como se merece” reflexionou a edil popular.

Os populares afirman que ter un monumento coa distinción de Patrimonio da Humanidade “é algo polo que moitas cidades darían o que fóra porque son conscientes do que isto significa para a promoción turística e cultural do municipio”. Jaime Castiñeira matizou que “nunca imaxinei, que logo de quince anos de que a muralla conseguise este importante recoñecemento, pola desidia do goberno chegásemos a unha data tan sinalada sen pena nin gloria”.

Dende que a muralla foi declarada pola Unesco, no ano 2000, como  ben Patrimonio da Humanidade o Grupo Municipal do PP  presentou diferentes propostas para a súa posta en valor. Agora coincidindo co décimo quinto aniversario da celebración os populares insisten en que “hai que ser ambiciosos e que hai que organizar con tempo suficiente unha programación que non se cinga só a un evento puntual que coincida co 30 de novembro, data na que se outorgou a distinción”.

Se ben para os populares “a promoción da muralla debe estar presente durante todo o ano” consideran preciso que “se organice un calendario de actos concreto para promocionar con tempo a conmemoración da muralla como Patrimonio da Humanidade”. O popular mesmo aportou diferentes ideas como por exemplo, a posibilidade de planificar actividades conxuntas nas que tamén se promocione o Camiño Primitivo declarado este ano  Ben Mundial.