ADEGA, SGO e FOP veñen de ser notificados polo Supremo de que o Alto Tribunal anula definitivamente o parque eólico Serra do Iribio (Oribio), paralizado cautelarmente polo TSXG desde 2019, por estar proxectado nunha zona de Rede Natura 2000 e contar cunha DIA obsoleta. Un grande varapau xudicial para a Xunta de Galicia, poucos días despois de que o TSXG tamén paralizara cautelarmente o parque eólico de Campelo de Greenalia, recorrido tamén por ADEGA pola vía contenciosa-administrativa.
Esta sentenza dá carpetazo final ao proxecto eólico Serra do Iribio, na ZEC Ancares-Courel, logo de 3 anos desde que se paralizase cautelarmente. Agora, as tres entidades recorrentes solicitaran a correspondente restauración das zonas afectadas polas obras.
Desde ADEGA, manifestan “o noso agradecemento a todas as entidades, ademais das recorrentes, a todos os colectivos e persoas que conformaron a plataforma Salvemos o Iribio e que fixeron posible esta histórica vitoria!”.
