O obrador de Taboada presenta tres sabores para un produto que toma o nome dunha expresión popular ligada ás vendimas nas beiras do Miño.
O obrador Galletas Xianas, de Taboada, amplía a súa oferta co lanzamento de Papeiras, unhas galletas dispoñibles en tres variedades: manteiga, améndoa e manteiga con pebidas de chocolate.
O nome recupera, segundo conta a tradición oral da zona, os aturuxos que se intercambiaban durante a vendima os viticultores das dúas beiras do Miño. Dende o lado de Taboada, Chantada e Carballedo berraban «Ei, rabudos!», mentres que dende a beira de Pantón e O Saviñao respondían «Ei, papeiros!». As explicacións populares sobre a orixe destes alcumes forman parte dese relato local que agora inspira o nome das galletas.
Galletas Xianas sinala que as Papeiras contan co selo Artesanía Alimentaria de Galicia e que se elaboran sen aditivos, conservantes nin colorantes. Con este lanzamento, o obrador une unha nova proposta doce cunha historia vencellada á paisaxe e á memoria da Ribeira Sacra.
