O titulo da película era “Kramer contra Kramer” o da canción “Mujer contra mujer”, aquí leva apelidos: PP de Galicia contra PP de Lugo, outra explicación coherente coido que non hai. Porque do contrario a que ven presentarse en Lugo e soltar esa bomba; Lugo non vai ter a hemodinámica máis que oito horas, as que xa ten, en plena campaña electoral. Por riba horas despois o candidato a alcaldía de Lugo, Sr Castiñeira, insinuaba que habería unha explicación por parte da consellería, pero tal cousa non se produciu.
A conselleira Rocio Mosquera, aparte de amosar que a vida das luguesas e lugueses ten para ela o valor que ten, xa lles adianto que máis ben pouco, tiña outras posibilidades en paga de vir tocar o nabo, que por riba este ano hai poucos por mor das inclemencias climatolóxicas, como xa informou a TVG estes días atrás. E claro, unha cachola ou un botelo sen uns greliños non vos é o mesmo, ou minto?
Pero, como lles dicía, a conselleira tiña outras posibilidades, por exemplo: non vir , pois ninguén a chamou; vir e non dicir nada, o cal tampouco sería de estrañar.Incluso vir e dicir que si, que luguesas e lugueses tamén somos persoas humanas ( ollo, digo persoas humanas, porque as últimas teorías apuntan a que hai persoas non humanas) e que iamos ter a Hemodinámica; aínda que non fora certo; que caro lle custaba?. Para iso estamos en campaña electoral.
