As obras de ampliación da escola infantil municipal de Palas de Rei xa remataron. Os traballos, executados polo Concello durante o verán, consistiron na creación dunha terceira aula e contaron cunha achega de 47.500 euros da Consellería de Política Social e Igualdade. A capacidade do centro pasará de 30 a 39 prazas.
O delegado territorial da Xunta en Lugo, Alfonso Villares, visitou as instalacións e reuniuse co alcalde, Pablo Taboada, para repasar os investimentos autonómicos no municipio. Segundo indicou Villares, a Xunta destinou o curso pasado 30.100 euros a cubrir o custo das 30 prazas que daquela ofrecía a escola infantil.
Durante a visita, o delegado sinalou que están en proceso de contratación as obras da terceira fase do polígono industrial. A actuación prevista ampliaría en preto de 40.000 metros cadrados a superficie actual, de 75.473 metros cadrados. Tamén informou dunha achega de preto de 162.000 euros do programa Rural Activo 2026 para que o Concello realice nove contratacións a xornada completa durante nove meses, destinadas a tarefas de prevención de incendios.
Villares detallou outras axudas autonómicas para Palas de Rei: 91.800 euros para mellorar os accesos a Campo Maior, Lestedo e Outeiro de Burdallos; 47.500 euros para pavimentar camiños en Vilaspesa; e dúas achegas do Fondo de Compensación Ambiental 2026, de 33.300 e 13.600 euros, para actuacións ambientais e acondicionamento de zonas verdes. Segundo explicou, Palas de Rei e Monterroso accederán tamén de forma conxunta a preto de 27.500 euros para renovar vías locais.
