" />

Suárez Barcia: “sen un bo sistema de control e localización quizais se acaben tomando medidas inxustamente contundentes contra unha poboación que non está actuando nada mal”

Ribadeo ten unha incidencia de 50 casos de covid a 14 días. Así o revelou o alcalde, Fernando Suárez, quen se amosou “preocupado” por estes datos, pero subliñou que a hostalería está a actuar con “compromiso e dilixencia” e que a cidadanía, en termos xerais, “tamén o está a facer ben”. O rexedor alude ás queixas da veciñanza e pide que a  Xunta corrixa as demoras nos rastrexos e na realización das probas PCR “porque sen un bo sistema de control e localización, quizais se acaben tomando medidas inxustamente contundentes contra unha poboación que non está actuando mal”.

Suárez Barcia declarou que  no Concello teñen certa preocupación polos datos que se están a revelar tanto no Estado, como en Galicia e, mesmo na Mariña ” e desde logo que Ribadeo tampouco pode ser unha excepción”. Segundo asegurou o rexedor tamén ven outras cousas que cómpre ter en conta como que, por unha banda, “vemos que a hostalería funciona ben e está a actuar con compromiso e dilixencia”  preocupados, en todo momento, polo que a Xunta poida decretar.

Doutra banda, o alcalde puxo o foco na cidadanía que, en termos xerais “faino ben”. “Non é que o diga eu, calquera pode botar un ollo ás rúas cheas de xente e todas as persoas están coa máscara”, subliñou o rexedor que explicou que a gran maioría da poboación vacínase, “aínda que algunhas persoas, non moitas, de xeito obtuso e totalmente errado, ao noso xuízo, non queren poñer a vacina e non se quere inmunizar co que isto supón para eles e para os que están ao seu redor”.

O rexedor indicou que tamén ven, en moitos casos, dende o Concello, queixas polas “enormes demoras” nos sistemas de rastrexo e as provas PCR, un punto sobre o que o alcalde quixo denunciar. E é que coñece, dixo, moitos casos de  xente que se confina por precaución, “por teren contactos estreitos con outras persoas positivas e teñen que agardar durante días para que lles dean unha cita para facer a PCR, cita que ás veces chega con moita demora”.

Para Suárez Barcia “isto é algo que a Xunta debera corrixir e reforzar con contundencia porque sen un bo sistema de control e localización quizais se acaben tomando medidas inxustamente contundentes contra unha poboación que non está actuando nada mal”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo