Un accidente rexistrado esta tarde na A-54, ao seu paso por Palas de Rei, deixa tres persoas feridas. Unha das vítimas sofre feridas de carácter grave. Foi evacuada ao Hospital Lucus Augusti, mentres que as outras dúas recibiron asistencia sanitaria no punto.
O sinistro ocorreu no quilómetro 23 da autovía, en sentido Santiago. O 112 Galicia tivo coñecemento da situación ás 15:30 horas, a través dunha alerta do 061-Urxencias Sanitarias.
Acto seguido, o persoal do Centro Integrado de Atención ás Emerxencias do 112 alertou aos Bombeiros de Chantada, ao GES de Monterroso, a Protección Civil e á Garda Civil de Tráfico.
