Este domingo e practicamente dende calquera punto da cidade, puideronse ver faroliños voadores, que crearon unhas 3.000 persoas, e que soltaron dende o Adarve da Muralla para conmemorar o 15º aniversario do monumento bimilenario como Patrimonio da Humanidade. O Adarve encheuse de xente, nenos, mozos e maiores, que foron soltando a partir das oito da tarde medio milleiro de faroliños nunha noite fría, pero clara e sen choiva, o que favoreceu o espectáculo de luz.
No acto participaron a Alcaldesa, Lara Méndez, e membros da Corporación municipal. Os actos de conmemoración do recoñecemento da Muralla como Ben Mundial continúan mañá luns, cando todos os lucenses e visitantes poderán degustar a partir das 18:00 horas nunha carpa instalada na praza Anxo Fernández Gómez un anaco de torta xigante e solidaria, pois a ración soamente custará 20 céntimos, que serán destinados a unha asociación sen ánimo de lucro.
E xa a fin de semana que ven, do 4 ao 8 de decembro, na carpa de Anxo Fernández Gómez haberá un concurso de fotografía sobre o monumento bimilenario. A partir de marzo do 2016, no Centro de Interpretación da Muralla estarán dispoñibles postais sobre a recuperación e posta en valor das portas da Muralla de onte e de hoxe.
