Unha persoa perdeu a vida esta noite ao saírse da vía o vehículo que conducía e impactar contra unha árbore en Nadela. Outra persoa que viaxaba no mesmo coche resultou ferida grave. Os feitos tiveron lugar na LU-546. Unha persoa particular alertaba do accidente ao CAE 112 Galicia ás 02:30 horas.
Decontado, o Centro de Atención ás Emerxencias 112 Galicia informaba do suceso a Urxencias Médicas que, ao chegar, indicaba que había unha persoa atrapada. Axiña, os Bombeiros de Lugo, a Garda Civil de Tráfico, o servizo de mantemento da estrada e a Protección Civil lucense achegáronse ata o punto. Outro alertante relataba ao CAE 112 Galicia que un dos ocupantes xa estaba fóra do turismo pero quedaba outra inconsciente no interior. A dotación do parque comarcal desprazou un equipo de excarceración. Finalmente, colaboraron na retirada da vítima, pero non estaba atrapada.
