" />
OLYMPUS DIGITAL CAMERA

Vilalba Aberta urxe á convocatoria dunha comisión de seguimento da Covid “plural e con presenza da oposición”

O Grupo Municipal de Vilalba Aberta compareceu hoxe de urxencia, co obxectivo de reclamar da Alcaldesa a “inmediata reactivación” da Comisión Municipal de seguimento da Covid. Unha a solicitude, rexistrada por escrito a través da sede electrónica do Concello, e a través da que se reivindica a “urxente convocatoria” dunha comisión, “constituída por decreto da Alcaldía no pasado mes de Marzo” e da que “nada se sabe, logo da inaugural do mes de Abril”.

En palabras do seu voceiro municipal, Modesto Renda, “cómpre unha análise e posta en común semanal da situación sanitaria do municipio, que nos permita anticipar, dun xeito máis áxil á par que eficiente, a toma de decisións en caso de necesidade”. Unha metodoloxía colexiada e plural, lembrou, “xa delimitada a imaxe e semellanza do que xa está a funcionar noutros Concellos, onde a opinión dos técnicos e forzas de seguridade municipais conte de verdade, e na que a presenza dos grupos municipais da oposición estea asegurada”.

Renda remarcaba así, o posicionamento da formación en relación coa actual situación de alerta, ao tempo que lamentou que, dende que Vilalba Aberta non está no goberno, a unidade municipal no que respecta á loita contra a pandemia “quedara en papel mollado”. “Tanto no Goberno como na oposición e ao respecto da Covid, Vilalba Aberta sempre foi leal; pero non pode ser que, coa que está caendo, a comisión de seguimento tan só se convocara unha vez en oito meses”, sentenciou.

Unha opinión compartida pola súa compañeira de grupo e vicevoceira municipal da formación, Mª Xosé Fernández, quen contextualizou a solicitude na necesidade de pór en marcha, de novo, esta comisión “por responsabilidade, para realizar un seguimento exhaustivo dos casos en tempo real e compartir aquela información e datos que permitan realizar as correspondentes previsións sobre o que poida pasar e preparar os diferentes servizos a fin de reaccionar de forma inmediata”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo