A sección sindical da CIG en ABANCA fai hoxe unha xornada de mobilizacións diante de varias oficinas que a entidade ten na cidade de Lugo para protestar polos excesivos obxectivos comerciais impostos pola empresa á plantilla, e demandando que a carga de traballo se adapte á xornada laboral.
Asemade, os delegados da CIG solicitan a equiparación salarial entre homes e mulleres, actualmente cunha diferencia superior aos 11.000 euros anuais; asemade, a fenda non queda aquí senón que, segundo explican, “ás mulleres se lles esixen obxectivos máis altos” que aos compañeiros homes.
Do mesmo xeito, o sindicato tamén solicita que se leve a cabo na empresa o Dereito de desconexión un dereito recollido pola Lei Orgánica de Protección de Datos e que a empresa non está a cumprir. Segundo denuncian, a empresa está a ofrecer aos traballadores tablets e móbiles de empresa “cos que pretende que traballemos fóra da xornada laboral”.
