A Deputación de Lugo puxo en marcha este martes a Guía de Colaboración coa que ofrece gratis aos concellos asesoramento técnico e administrativo para que poidan concorrer ás axudas que vén de aprobar o Goberno Central por danos en infraestruturas producidos polos temporais que tiveron lugar a comezos do 2015. O Deputado de Xestión Territorial, Argelio Fernández Queipo, enviou hoxe unha comunicación aos municipios afectados para darlles a coñecer a guía.
Trátase dun novo servizo gratuíto para os municipios que se xestiona dende o departamento de Xestión Territorial, pois é a área provincial que conta co persoal especializado para esta prestación. Con esta iniciativa, a Deputación aforra cartos aos municipios lucenses, posto que non terán que recorrer a contratacións externas.
Na provincia de Lugo, segundo o Estado, os 8 Concellos que tiveron desperfectos e, polo tanto, poden concorrer a estas subvencións son: Begonte, Cervantes, Guntín, Lugo, O Incio, Outeiro de Rei, Quiroga e Xermade. O Estado subvenciona ata o 50 % dos custos das actuacións a executar.
Os concellos poden elixir entre dúas vías de colaboración:
1º.- Asistencia técnica e administrativa, que implica o estudo dos danos con visitas in situ dos técnicos, a recompilación de toda a memoria fotográfica sobre o estado da infraestrutura, informes con asesoramento sobre as melloras a levar a cabo para previr posibles novos danos e a redacción dos proxectos finais. A data limite para solicitar esta asistencia remata o 9 de febreiro.
2º.- Xestión directa, que implica, ademais do asesoramento técnico, da recompilación de toda a información fotográfica e da redacción do proxecto; a tramitación das axudas ante o Ministerio de Facenda e Administración Pública. A data límite para solicitar a xestión directa remata o 2 de febreiro.
A Deputación ten toda a información relativa a esta Guía de Colaboración na súa páxina web (www.deputacionlugo.org). Os Concellos interesados deberán presentar unha solicitude, que se pode descargar dende a web, no Rexistro Xeral da entidade provincial, dirixida á Presidencia. Nela indicarán o tipo de axuda que desexan que lles preste a Deputación de Lugo para tramitar as devanditas subvencións estatais, o prazo de presentación remata o 5 de marzo.
