Dirixido á Sra. Vicepresidenta da Excma. Deputación Provincial de Lugo e responsable da área de Cultura desta entidade, Dona Tareixa Antía Ferreiro Tallón.
Desde a Federación de Asociacións Veciñais “Lucus Augusti” da provincia de Lugo, volvemos pedir explicacións, fixémolo xa a inicios do pasado mes de xuño de 2022-, acerca da incomprensible demora do programa “Musiqueando” -pertencente á Área de Cultura da Deputación Provincial de Lugo-, que en pleno mes de xullo de 2022 -xa oficialmente e para todos os efectos, pleno verán- , segue sen estar operativo, e que, segundo fontes próximas ao departamento competente nesta materia, este ano 2022, non vai estalo en ningún momento.
Ditas explicacións foron trasladadas á responsable directa da xestión deste programa, a Sra. Dona. Tareixa Antía Ferreiro Tallón, por ser a primeira titular da área de Cultura da Excma. Deputación Provincial de Lugo, ademais de Vicepresidenta desta entidade -e ser, por tanto, tanto ela como os seus correspondentes asesores, perceptores de soldos públicos, pagados con diñeiro de todos os contribuíntes.
Un mes despois de haberllas solicitado, seguimos como ao comezo: sen resposta. Cabe matizar que o programa “Musiqueando” supón un incentivo moi significativo tanto para artistas como asociacións, xa que permite ás entidades do tecido asociativo de toda a provincia lucense dispoñer, nas súas celebracións populares, de actuacións musicais e/o de grupos folclóricos subvencionadas pola Deputación Provincial de Lugo; motivo polo cal, desde a Federación de Asociacións Veciñais “Lucus Augusti” da provincia de Lugo sempre valoramos moi positivamente a existencia do devandito programa, que data de varios anos atrás. A inoperatividade do programa “Musiqueando”, en pleno mes de xullo de 2022, e transcorrida xa unha importante relación de celebracións populares organizadas por entidades do tecido asociativo ao longo e ancho da provincia lucense, supuxo un grave prexuízo ás mesmas, xa que non puideron dispoñer do catálogo de actuacións ofertado polo devandito programa.
Asemade, o mencionado prexuízo esténdese tamén aos propios artistas e grupos musicais incluídos no programa, xa que a súa principal finalidade é a promoción e difusión da música tradicional, as Bandas de Música, Grupos Corais e artistas de música tradicional en xeral.
Segundo fontes próximas á área con responsabilidade directa da xestión e execución de devandito programa -a área de Cultura da Deputación Provincial de Lugo-, neste ano 2022, o programa “Musiqueando” non verá a luz en ningún momento, ocasionando un importante prexuízo a quen, dentro das entidades asociativas veciñais ao longo e ancho de toda a provincia lucense, organizan festexos e celebracións populares; así como tamén aos propios artistas e grupos musicais.
Desde a Federación de Asociacións Veciñais “Lucus Augusti” da provincia de Lugo, volvemos esixir que os responsables públicos -pagos con diñeiro de todos os contribuíntes- cumpran coa súa obriga, tanto na xestión como nas explicacións que correspondan, e que, no caso que nos acupa, os veciños e veciñas de toda a provincia lucense merecen coñecer a situación actual do programa “Musiqueando” , os motivos da súa demora -e, neste momento xa, da súa inexistencia-, e que accións levou a cabo a responsable da área de Cultura da Deputación Provincial de Lugo nesta materia, a efectos de paliar os graves prexuízos ocasionados a multitude de asociacións veciñais ao longo e ancho da provincia lucense. Neste punto cabe preguntarse: Que opcións temos as entidades do tecido asociativo para solicitar unha actuación musical para algunha celebración popular que organicemos? Van atender ditas peticións? Ou, pola contra e como se comenta, van atender exclusivamente as que proveñan dalgún colectivo “amigo”? Seguimos, por tanto, agardando a súa resposta e explicacións respecto diso.
Lugo, martes 5 de xullo de 2022. Xunta Directiva da Federación de Asociacións Veciñais “Lucus Augusti” da provincia de Lugo.
Federación de Asociacións Veciñais “Lucus Augusti” da provincia de Lugo.
