A Pontenova acollerá os días 10 e 11 de novembro unha nova edición das Xornadas da Terra de Miranda, unha serie de encontros nos que se analizará a situación do medio rural galego na actualidade. As xornadas están organizadas polo movemento de renovación pedagóxica Nova Escola Galega e contan coa colaboración activa de 38 colectivos de toda índole da comarca, ademais da dos concellos da Pontenova, Riotorto, Meira e Trabada. Ao longo de todo o programa participarán un total de 26 relatores e relatoras.
Segundo a organización, estes encontros teñen varios obxectivos: analizar e explicar a realidade educativa no medio rural galego en xeral, e na Terra de Miranda en particular; identificar as características naturais, económicas, sociais, asociativas… que determinan o estado actual da comarca; situar estes elementos no contexto de Galicia e na procura da concepción dunha estratexia global de desenvolvemento do medio rural; e poñer en común experiencias educativas, asociativas e económicas que contribúan á planificación dunha estratexia galega de desenvolvemento concibida desde e para o medio rural.
