A Xunta aduxicara de xeito “inminente” as melloras no abastecemento de auga de Outeiro de Rei

A Consellería de Infraestruturas e Mobilidade adxudicará de xeito “inminente” as obras de mellora do sistema de abastecemento de auga no municipio de Outeiro de Rei, segundo avanzou o delegado territorial da Xunta en Lugo, José Manuel Balseiro, quen acudiu hoxe ao concello para a presentación do proxecto. Nestes días están a ter lugar as mesas de contratación que avalían as ofertas presentadas.

A actuación ten por obxecto reforzar o servizo de subministro de auga no concello mediante a ampliación da rede e, segundo destacou o delegado, conta cun orzamento de licitación de 600.000 euros e un prazo de execución de seis meses.

O proxecto prevé ampliar a rede de abastecemento, conectando a rede de distribución -que actualmente se alimenta mediante unha tubaxe que vai dende o depósito de cabeceira ata o polígono industrial de Matela- coa rede que se abastece da propia Estación de Tratamento de Auga Potable (ETAP). O concello de Outeiro de Rei dispón dunha ETAP que foi ampliada en dúas ocasións para aumentar a súa capacidade, e dous depósitos de cabeceira de 1000 e 2700 metros cúbicos, respectivamente.

As obras consistirán na execución dun ramal principal cunha lonxitude aproximada de 3.032 metros de tubaxe de PVC. O delegado, salientou “a gran complexidade técnica da actuación” na que se contemplan a execución de dous cruzamentos subterráneos: un no río Miño e outro na estrada Nacional-VI, que se realizarán mediante perforación dirixida. O cruce do río Miño terá unha lonxitude de 128 metros e o da estrada N-VI será de 18 metros. O orzamento previsto para esta parte concreta dos traballos é de algo máis de 100.000 euros.

Balseiro dixo que, con esta actuación “garántese o abastecemento cunha mellor calidade á poboación, de xeito que poidan ter auga en cantidade e calidade suficiente para satisfacer a demanda de auga potable”.

Unha vez executado o novo sistema de abastecemento, permitirá reforzar as condicións nas que se presta o servizo á poboación da zona, á cabana gandeira e ao parque empresarial de Matela.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo