A delegación de ADEGA en Lugo anunciou que acadou os primeiros 6.000 euros da campaña de recadación “Río Rato sen cemento”, unha cifra que, segundo a entidade, permite garantir a presentación dun recurso contencioso-administrativo contra o desenvolvemento urbanístico previsto nas nacentes do río Rato.
A asociación explica que esta cantidade foi reunida en menos dun mes desde o inicio da campaña e considera que este primeiro obxectivo reflicte o respaldo cidadán á defensa deste espazo natural. Segundo ADEGA, o proxecto urbanístico afectaría unha das zonas de maior valor ambiental da cidade de Lugo.
Desde a organización agradecen a resposta das persoas doantes e sinalan que as achegas recibidas representan un apoio ao proceso de defensa ambiental que están a impulsar. A entidade sostén que a protección das nacentes do río Rato resulta importante para a conservación da biodiversidade, a regulación climática e a conectividade ecolóxica entre o río Rato e o Miño.
A pesar de acadar o primeiro obxectivo, a campaña de financiamento segue aberta. ADEGA pretende reunir un total de 12.000 euros nos vindeiros dous meses para afrontar o conxunto dos gastos derivados do procedemento xudicial, entre eles a elaboración de informes técnicos, a representación procesual e outros custos asociados á defensa legal.
A entidade indica que os primeiros 6.000 euros permiten iniciar o proceso, pero considera necesario completar a recadación para afrontar o litixio “con todas as garantías”.
Neste contexto, ADEGA fai un novo chamamento á cidadanía, ás asociacións e ás persoas interesadas na conservación do territorio para que continúen colaborando coa campaña de doazóns. A organización sostén que o proceso transcende o ámbito xudicial e constitúe tamén unha oportunidade para promover a implicación social na defensa dos espazos naturais fronte ao modelo urbanístico previsto para esta contorna.
