Despois dunha longa asemblea, que durou máis de 5 horas, os socios de Agromuralla decidiron abandonar a tractorada. Así o confirmou hai uns minutos a este medio Odón Castro, un dos membros da asociación. Foi unha decisión difícil, na que non contaron con unanimidade, pero finalmente a voz da maioría impúxose. Os gandeiros consideran que a resolución da Subdelegación do Goberno non é máis que unha forma de convidalos a marchar, xa que a presenza dos tractores perdería forza e visibilidade ao quedar reducida a un só carril, e iso sempre que quedasen libres outros dous para a circulación, o que nalgúns tramos da muralla implicaría a súa desaparición.
Os tractores acenderán de novo os seus motores o próximo venres, apurando ata o final o prazo posto pola Subdelegación para que Agromuralla cumpra a resolución e reestruture os vehículos. Volven ás súas granxas decepcionados, pero queren deixar claro que a súa marcha non é unha rendición, senón un cambio nas súas estratexias para conseguir o seu fin principal: un prezo xusto polo leite que garanta a continuidade das explotacións.
