Alternativa Cidadá de Esquerdas mantivo a xuntanza prevista con representantes de Esquerda Unida. ACE e EU intercambiaron impresións sobre a actual situación económica, social e política do municipio, analizaron o documento de ACE “70 bases programáticas para un goberno de unidade popular” e examinaron a posible integración de EU nunha candidatura cidadá de unidade popular para o Concello de Lugo.
Na xuntanza, enmarcada na rolda de contactos que ACE está a manter coas organizacións e colectivos sociais do ámbito rupturista da cidade, os representantes de ambos os dous colectivos amosaron unha ampla sintonía na diagnose xeral do Concello e na necesidade de establecer un novo marco político para Lugo.
ACE e EU consideran urxente recuperar o Concello para a cidadanía, logo de décadas marcadas polas políticas neoliberais desenvoltas polos diferentes gobernos do bipartidismo . Así, coincidiron na necesidade dun goberno municipal de cambio, capaz de levar adiante a imprescindible rexeneración democrática do Concello e de poñer a institución municipal ao servizo das necesidades reais da cidadanía lucense, especialmente afectada pola crise económica.
De feito, ACE e EU consideran prioritario establecer unha planificación global do municipio baseada, fundamentalmente, nun urbanismo racional e non especulativo, na primacía dos servizos público, na participación cidadá, na igualdade e na xeración de emprego, a potenciación da actividade económica e a erradicación da pobreza. Prioridades e principios básicos que deben desenvolverse, xa que logo, nun programa concreto de goberno para o concello de Lugo.
Alternativa Cidadá de Esquerdas continuará nos vindeiros días a rolda de contactos con outras forzas políticas, organizacións e colectivos sociais da cidade, de cara á configuración da candidatura de unidade popular que será sometida ao correspondente proceso de primar.
