O voceiro do BNG no concello de Lugo, Rubén Arroxo, pediu que Concello e Xunta fagan públicos os expedientes relativos ao tapado dos escudos franquistas en edificios públicos da cidade e tamén toda a documentación relativa á denuncia e comunicacións entre administracións nas que a Xunta basea a súa intención de volver a destapar os símbolos franquistas. “O concello debería publicar na web municipal toda a documentación coa que lle requiriu á Xunta a reposición da legalidade e a denuncia que motivou todo este lío para que se saiba como se xesta e se resolve este asunto que non tiña que terse posto en marcha” dixo Rubén Arroxo.
Ademais, o voceiro do BNG tamén sinalou que “o señor Balseiro debería, tamén facer público todo o expediente co que se tramitou a actuación feita para tapar os escudos”. Para o BNG, “a maiores do xeito de tramitar estas actuacións están présas manifestadas polo señor Balseiro para destapar o escudo franquista do IES Lucus Augusti” e advirten que “Balseiro abriu un debate inexistente por que no PP están preocupados pola perda de apoios que se van cara a ultradereita”.
Arroxo adiantou que o BNG seguirá traballando para eliminar a simboloxía franquista da cidade porque “ademais do que marca a Lei de Memoría Histórica, tense demostrado que a grande maioría da poboación non comparte que se siga homenaxeando a un réxime ditatorial que cometeu auténticas atrocidades”. O BNG seguirá levando ás institucións iniciativas para avanzar na retirada de símbolos relacionados co franquismo.
O voceiro do BNG lamentou asemade que a Xunta “non se dea tanta présa” para solventar outros asuntos que ten pendentes con Lugo como a apertura do novo auditorio ou darlle solución ao cuartel de San Fernando. Para o BNG resulta sorprendente “as presas” do Delegado da Xunta para destapar os escudos anticonstitucionais “mentres permite que outras cuestións que son máis importantes para Lugo, permanezan sen solución”.
