Candidatos do PP visitan obras do Centro Integrado de Saúde no Barrio da Residencia

A cabeza de lista do PP por Lugo para as eleccións autonómicas, Elena Candia, acompañada polo conselleiro, en funcións, de Sanidad, e outros membros da candidatura, visitaron na tarde de hoxe o barrio da Residencia da capital lucense, que contará co primeiro Centro Integrado de Saúde de Galicia. Na visita participaron tamén outros membros da lista electoral por Lugo. Candia destacou que a Residencia recuperará a vitalidade que tivo no pasado recente co desenvolvemento que se leva a cabo nos terreos do antigo Hospital Xeral.

 O pasado mes de febreiro comezou a segunda transformación do barrio da residencia, tras o derrubo do antigo hospital xeral. Nesta parte da cidade está en construción o primeiro Centro Integrado de Saúde de Galicia, mediante a remodelación do antigo hospital materno infantil, que permitirá ganar máis de 8.000 m² en servizos sanitarios. O edificio, remodelado na súa integridade albergará , distribuídas nas súas 6 plantas, un centro de saúde, PAC e urxencias, área para Saúde Mental e unha base para o 061.

Ademais deste centro de saúde, esta aposta da Xunta inclúe outras edificacións para servizos públicos, fundamentalmente do ámbito socio-sanitario, como unha nova residencia da 3ª idade, con 120 prazas, promovida pola Consellería de Política Social, en colaboración coa Fundación Amancio Ortega e que se levantará sobre a parcela do antigo hospital.

Igualmente, este espazo albergará unha oficina de emprego, unha central de biomasa -que dará servizo ao complexo-, e un centro de emprendemento aeronáutico.