“Contamos” é o nome co que, os alcaldes de Becerreá e Sarria que capitanean os partidos Galicia Sempre e Camiña Sarria, ao que se sumou o Partido Galego, bautizaron a nova coalición electoral, para intentar acadar representación polo Partido Xudicial de Lugo na Deputación.
Ata o momento a coalición “Contamos” presentarase nos concellos de Lugo, Becerreá, Sarria, Samos e O Páramo. Neste último concello será o anterior alcalde Gumersindo Rodríguez (Sindo) o representante da coalición.
Segundo puido saber este xornal, estanse a negociar candidaturas en, polo menos, outros tres concellos máis, todos no Partido Xudicial de Lugo, o que podería cambiar a representación dos partidos no ente provincial.
Tanto o alcalde de Sarria, Claudio Garrido, como o de Becerreá, Manuel Martínez, teñen declarado que “o motivo de formar esta coalición non é outro que buscar a formula para solucionar a discriminación que están a sufrir os seus concellos por parte do Psoe e do Bng” partidos que gobernan o ente provincial. Segundo as súas declaracións, os seus concellos non recibiron investimento algún nos últimos catro anos por parte da Deputación de Lugo e “a nosa veciñanza non ten porque estar discriminada por non votar aos partidos que gobernan a Deputación de Lugo”.
Os fondos que chegaron as arcas municipais proceden do Plan Único que se transfiren aos concellos dende a Deputación de forma obrigatoria.
É de destacar o caso da residencia de Becerreá que leva máis dun ano rematada e sen abrir, o que causa graves prexuízos á cidadanía da comarca deste concello da montaña luguesa.
Hoxe ás seis da tarde representantes da coalición formalizarán a inscrición diante da xunta electoral.
