Un accidente de tráfico rexistrado na N-640, á altura do quilómetro 83, ao seu paso pola parroquia de Teixeiro, saldouse con varias persoas feridas, entre elas unha muller que quedou atrapada nun dos vehículos.
O 112 Galicia recibiu o aviso ás 16:10 horas a través do sistema de emerxencia (eCall) dun dos coches implicados. Ao contactar co propietario, este confirmou que na colisión estaban involucrados tres vehículos e que el mesmo resultara ferido. Pouco despois, persoal do Servizo de Urxencias Sanitarias de Galicia-061 informou do mesmo accidente, engadindo que unha persoa podería estar atrapada no interior dun dos turismos.
Con esta información, desde o Centro Integrado de Atención ás Emerxencias 112 Galicia mobilizáronse aos Bombeiros de Lugo, á Garda Civil e á Policía Local.
Unha vez no punto, os Bombeiros confirmaron que foi necesario empregar material de excarceración para liberar a unha muller atrapada nun dos vehículos. Pola súa banda, os servizos sanitarios trasladaron a tres persoas feridas ao hospital de referencia.
