Goberno provincial e oposición acordan levar a cabo melloras no servizo de teleasistencia que pasan, entre outras cousas, por aumentar as prazas ofertadas para este servizo. Deste xeito,pasarán a ser 1.555 fronte as 997 que hai na actualidade.
Así o anunciou esta mañá o voceiro do PSdeG na Deputación, Álvaro Santos logo de manter un encontro coa deputada do Partido Popular, Mari Teijeiro. Esta xuntanza ten lugar logo de que o Goberno provincial decidise no Pleno do mes de maio deixar sobre a mesa a ordenanza deste servizo co fin de presentala “co maior consenso e celeridade posible” destacou o Deputado.
As melloras que a Deputación introduciu neste servizo inclúen ademáis do aumento de prazas unha actualización dos baremos para a concesión de prazas introducindo baremos psicosociais e psicosanitarios e, ademais, o ente provincial porá a disposición dos concellos persoal para, por exemplo, elaborar informes sobre os demandantes.
Santos Ramos subliñou que “chegamos ao acordo de convocar unha reunión o vindeiro 14 de xuño, ás 11:00 horas no Pazo de San Marcos, na que participarán todos os grupos da Corporación, alcaldes da provincia, traballadores sociais que fan o traballo nos Concellos da provincia, así como co colexio profesional de Traballadores Sociais de Lugo, co fin de facer unha ordenanza que satisfaga a todos os implicados no servizo”.
