" />

II Xornadas sobre restauración de castros do Noroeste penínsular

A Consellería de Cultura, Educación e Ordenación Universitaria organiza esta fin de semana en Lugo as II Xornadas sobre a conservación en castros do Noroeste peninsular, que reunirán a arredor dun centenar de arqueólogos, restauradores, investigadores e estudantes da materia.

O Museo Arqueolóxico do Castro de Viladonga programou esta iniciativa como complemento ás obras de acondicionamento e consolidación arqueolóxica que a consellería está a desenvolver nese xacemento, traballos nos que inviste 72.000 euros. Deste xeito, aprovéitase unha intervención que está en marcha como escusa e como marco para analizar o estado actual e as perspectivas de futuro dos proxectos de investigación e recuperación dos castros.

Participarán expertos procedentes de distintos puntos de Galicia, Asturias, León e Portugal, que explicarán as actuacións realizadas en diversos xacementos, destinadas á escavación, restauración, conservación ou difusión e posta en valor dos castros.

Así, a primeira sesión terá lugar o venres na Casa do Saber, a sede da Vicerreitoría, na que arqueólogos, restauradores e conservadores relatarán as súas experiencias nos castros galegos, do occidente asturiano, da montaña leonesa ou no Monte Mozinho e o noroeste de Portugal.

O sábado día 13 os participantes realizarán unha visita guiada ao castro de Castromaior, en Portomarín, e outros xacementos da contorna. Por último, o luns día 15 o castro de Viladonga acollerá una sesión práctica, que incluirá a elaboración de morteiro e descrición in situ das técnicas de drenaxes e protección dos muros. 

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo