Afundación, a Obra Social de ABANCA, continúa desenvolvendo o seu ciclo de conferencias Educación século XXI con novos relatores e temas, consolidando así esta firme aposta da entidade pola difusión de modelos formativos diversos, en consonancia cos desafíos e as realidades sociais actuais e creando foros de intercambio de coñecemento que inclúan tanto a docentes como a nais e pais.
A próxima conferencia será Límites que nos axudan a medrar da man da psicóloga María Jesús Álava, Premio 2017 ao Mellor Labor de Divulgación da Psicoloxía e elixida como unha das TOP 100 Mulleres Líderes en España nos anos 2012 e 2017. Terá lugar mañá mércores 10 de abril, ás 20.00 h, na Sede Afundación de Lugo, e contará coa presenza do director territorial de ABANCA en Lugo, Javier Soto Garrido, e da responsable da Área Educativa de Afundación, Carmen Pérez Larrán.
Neste novo encontro falará sobre a realidade que viven os nenos e nenas, as nais e pais, os educadores e a sociedade actual en xeral en relación á educación dos fillos e fillas, especialmente nos seus primeiros anos. A entrada é gratuíta, pero é necesario inscribirse previamente na web ataquilla.com.
