Un home duns 50 anos perdeu a vida a última hora da tarde de onte tras ser atropelado por un tren na estación de Sarria. Segundo se lle indicou ao 112, a vítima camiñaba acompañada doutras dúas persoas cando, por causas que agora se investigan, caeu ás vías. Todo apunta a que o accidente tivo carácter fortuíto.
A circulación ferroviaria na zona permaneceu pechada durante pouco máis dunha hora. O tren que arrolou ao home facía o traxecto entre A Coruña e Monforte. Nel viaxaban tres persoas. Ademais, outro convoi tivo que deter a súa marcha a consecuencia do sinistro.
O 112 Galicia recibía a chamada dunha persoa particular ás 20:50 horas de onte. O persoal do Centro de Atención ás Emerxencias alertou a Urxencias Médicas e o ADIF. Tamén se informou aos Bombeiros de Sarria, a Protección Civil e á Garda Civil.
