O BNG reclamará no Parlamento as axudas da Xunta para restaurar as pallozas de Piornedo

Dende o BNG trasladaran ao Parlamento as demandas da veciñanza de Piornedo que leva anos reclamando axudas da Xunta de Galicia para restaurar as pallozas.

Así mesmo defenderán que “se restitúa a liña de axudas que o Partido Popular suprimiu en 2010 a través das que o Instituto Galego de Vivenda e Solo colaboraba, en convocatorias anuais, no mantemento e rehabilitación destas construcións históricas, de orixe celta, e de incalculábel valor para o conxunto do país”.

Segundo o BNG “as actuacións levadas a cabo hai catro anos foron insuficientes, un remendo”. Desde o BNG sinalan que “cremos que a Xunta de Galiza debe recuperar a convocatoria anual dunha liña de axudas para permitir que as actuacións se manteñan no tempo e desta maneira garantir a súa conservación evitando a situación actual, é dicir, que o deterioro sexa tal que pode ser irreversíbel se non se actúa con urxencia”.

E lembran ao Goberno galego que “as pallozas están declaradas BIC e constitúen un elemento fundamental do patrimonio cultural galego e un símbolo da nosa identidade colectiva”.

Neste senso, o BNG sinala que “igual que as persoas propietarias teñen legalmente estabelecida a obriga de garantir a súa conservación, a Xunta de Galiza conta con competencia exclusiva en materia de patrimonio e a obriga de garantir a súa protección, conservación e enriquecemento, como dispón a Lei de patrimonio cultural de Galiza”.

 

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo