O Concello acondicionará 363 novas prazas de aparcadoiro gratuítas no HULA

Logo das declaracións feitas onte polo Delegado da Xunta José Manuel Balseiro ao respecto de prazas de aparcadoro gratis na contorna do HULA, o Goberno Municipal por medio da Alcaldesa Lara Méndez, deu a coñecer que se asinou contrato para obras de acondicionamento da parcela municipal situada en fronte do HULA como aparcadoiro público e gratuíto, por un orzamento de 82.649 euros.

Méndez destacou que  “dos 25.000 m2 de superficie que ten a parcela municipal situada en fronte do HULA, adecuaranse como aparcamento 12.200, que terán capacidade para 363 vehículos”. Os traballos precisos consisten no movemento de terras para a explanación e nivelación do terreo, que se cubrirá con zahorra, e a instalación dun peche perimental vexetal de tulla. Así mesmo, protexerase a mámoa cun peche de madeira, formado por postes  verticais unidos por elementos horizontais tamén de madeira, formando dúas barandillas a distintas alturas, a 5 metros de distancia dos restos arqueolóxicos.

As actuacións levarán aparellado un control arqueolóxico na parcela e teñen un prazo de execución de 3 meses.

O novo aparcadoiro público e gratuíto en fronte ao HULA “cumpre unha gran demanda veciñal e complementa a ampliación das prazas que xa fixo o Goberno no 2016 coa reordenación do estacionamento na estrada que circunda o centro hospitalario”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com