O Concello de Bóveda vén de remitir un comunicado a Xornal de Lugo no que responde ás acusacións dos socialistas do municipio, publicadas onte por este diario, e nas que sinalaban ao alcalde da localidade como primeiro beneficiario dunhas subvencións sacadas polo propio Concello.
Segundo aclaran dende o Goberno local, polo momento non hai ningún regulamento que aprobe esas subvencións polo que “ninguén as puido solicitar polo de agora, tampouco o rexedor”.
Con todo, o Goberno explica que o que si se pediron foron varias licenzas de obra pero as subvencións non poden ser solicitadas aínda. Primeiro teráse que aprobar o regulamento onde se establezan as bases da convocatoria e o tipo de actuacións que se van poder acoller ás axudas e, despois, os veciños da localidade poderán solicitalas.
“Será decisión de cada persoa solicitalas ou non e, posteriormente, resolverase a súa concesión sempre e cando cumpran os requisitos”, conclúen dende o Goberno local.
