O voceiro municipal, Miguel Fernández, presentou este xoves no rexistro da Xunta fotografías e planos de todas as parcelas dotacionais, unhas 14 diseminadas por toda a cidade, das que dispón o Concello para poñelas a disposición da Consellería de Política Social, para construír unha residencia de maiores na cidade.
“Hoxe é un día moi importante para os veciños e veciñas de Lugo, que ven como a Xunta, por fin, fai caso a unha das nosas demandas e se compromete coa tan necesaria e demandada residencia da terceira idade”, subliñou Fernández, quen agradeceu a boa disposición da Xunta para que a cidade conte cun novo centro público de maiores.
Fernández destacou que despois de numerosas xestións da alcaldesa, o conselleiro de Política Social, José Manuel Rei Varela, remitiu unha carta mostrando “que o seu compromiso é en firme e que lle acheguemos todas as parcelas dispoñibles para executar o investimento”.
O voceiro municipal asegurou que, aínda que chega tarde este compromiso, é un investimento moi necesario, ao tempo que lembrou que dende hai 40 anos non se creou nin unha soa praza pública de residencias para os maiores en Lugo.
