Varios deputados do Grupo Provincial Popular, acompañados de concelleiros do Grupo Municipal do PP de Castroverde, visitaron hoxe o polígono industrial do municipio.
O voceiro provincial popular, Antonio Ameijide, non entende “os nulos avances” dados na promoción desta zona industrial “que en lugar de ser un polo xerador de riqueza para Castroverde converteuse nunha zona chea de toxos e matorrais”.
Dende o PP critican a situación á que chegou a que tiña que ser unha zona industrial e de referencia para Castroverde, que se creou mediante un convenio de colaboración entre a Deputación de Lugo, Suplusa e o Concello de Castroverde.
A adxudicación da obra desta zona industrial tivo lugar no ano 2010 e rematou en torno ao ano 2015. “Dende entón, nada se fixo por parte do rexedor local nin dos diferentes gobernos socialistas na Deputación de Lugo por impulsar de xeito real e efectivo esta zona industrial”, lamentan.
“Por desgraza, actualmente o polígono non chega nin a unha ínfima porcentaxe de ocupación, o estado de mantemento é nefasto e o máis grave é o nulo interese dos gobernos provincial e municipal por potencialo”, afirmou Ameijide.
