O PP reivindica o Camiño como “elemento económico tractor na provincia”

Os candidatos ao Congreso e o Senado, Jaime De Olano, José Manuel Barreiro e Rosa Arza, acompañados do conselleiro de Cultura da Xunta, Román Rodríguez, puxeron en valor este domingo a importancia do Camiño como “elemento económico tractor da provincia”. Así o trasladaron a hostaleiros dos municipios polos que discorre a ruta francesa, no marco dun encontro organizado polo PP, co fin de recoller as propostas deste colectivo e mellorar así a actividade que desenvolven se acadan a confianza dos españois nas eleccións do 28 de abril.

Os populares destacaron a importancia de que tanto a iniciativa privada como a pública traballen conxuntamente para aumentar a calidade e consolidar esta iniciativa como un elemento dinamizador da economía local durante todo o ano. Precisamente, o rexedor de Portomarín, Juan Serrano, que exerceu como anfitrión, explicou as actuacións que se están a levar a cabo en clave municipal e que permiten que “pasemos do concepto de albergue a hotel de calidade”. Tal é así que, na actualidade, esta localidade ten a ratio máis alta de Galicia en camas abertas. Conta con 1.700, o que demostra, indicou Serrano, que todo o que xira entorno a este recurso turístico supón “unha industria xeradora de emprego”.

O Camiño Francés rexistra o 60% dos peregrinos e, en total, son 120 os concellos que se inclúen nalgunha das rutas. A Santiago chegan peregrinos de 178 países; o que, en palabras do conselleiro, pon de relevo que este recurso é “a galiña dos ovos de ouro de Galicia”.