O Presidente da Xunta, Alberto Núñez Feijóo, estivo en Lugo este sábado presidindo a convención que celebraron os populares, na Facultade de Veterinaria. De novo resaltou o ámbito sanitario como prioridade nas súas políticas, e volveu asegurar que o HULA contará con Medicina Nuclear e Radioterapia.
Do que non dixo nada foi da decisión da Xunta de non implantar a hemodinámica 24 horas na provincia.
Na quenda de discursos, o candidato do Partido Popular á alcaldía de Lugo, Jaime Castiñeira, afirmou, que “a de López Orozco é unha candidatura fraude porque sabe que non vai volver gobernar”.
Nesa liña, Castiñeira rexeitou a política laboral que veu desenvolvendo o alcalde do municipio López Orozco ao longo dos últimos 16 anos, que cualificou de “ axencia de colocación”, que se reflicte, nas súas palabras, na multiplicación de empresas que prestan servizo para a administración municipal, que pasaron de ser 13 a superar as 50 firmas.
Ainda que asistiron Elena Candia e Raquel Arias, en ningún momento se fixo referencia á posible candidata a gobernar a Deputación de Lugo, no caso de gañar os populares as vindeiras eleccións municipais. Algunhas fontes consultadas subliñaron que esa cuestión non tocaba o sábado.
