O Tribunal Superior de Xustiza de Galicia (TSXG) revogou a sentenza da sección segunda da Audiencia Provincial de Lugo que condenou a oito anos e medio de prisión a un acusado de abusar sexualmente nunha lavandería, de forma continuada, dunha muller de 65 anos, a cal ten recoñecida unha discapacidade do 65,5 %. A Sala do Civil e Penal considera que os feitos non quedaron acreditados, polo que absolveu ao acusado. Así, indica que “existen contradicións entre as diversas declaracións prestadas pola denunciante, xa sexan relativas ao número e á natureza dos actos sexuais que lle serían impostos como á temporalización dos devanditos actos ou tamén ás circunstancias que os rodearían, así como imprecisións significativas”.
O tribunal, ademais, afirma que, a ese testemuño, “flutuante e falto de concreción”, se une “á carencia de verdadeiros elementos de corroboración (esenciais cando nos achamos ante o testemuño único da vítima-testemuña)”. Os maxistrados tamén salientan que non se fixo unha análise de credibilidade da vítima. Por iso, acolleron o recurso de apelación interposto polo procesado. Contra a sentenza cabe presentar recurso.
