Colisión entre un camión e un coche no concello lucense de Taboada. O tráiler transportaba chapas metálicas de gran tonelaxe, que acabaron esparexidas pola vía. Segundo o servizo de emerxencias 112, os feitos producíronse en torno ás dúas da tarde a apenas un quilómetro de Taboada, na N-540, que une esta localidade con Lugo.
O camión quedou obstaculizando totalmente a estrada, polo que na zona se produciron importantes retencións. O tráfico tivo que ser desviado mentres se procedeu á limpeza da vía e á retirada do camión e a súa carga. A esta hora a situación xa está normalizada.
O persoal do CAE 112 Galicia alertou ao persoal de Urxencias Médicas, xa que un dos implicados no sinistro estaba moi nervioso. Tamén se informou aos Bombeiros de Chantada, ao GES de Monterroso, a Protección Civil e á Garda Civil de Tráfico.
