O condutor do camión de explosivos precisou asistencia sanitaria. Pola contra, o condutor do outro camión, de transporte de alimentación, resultou ileso.
Asemade a Xunta de Galicia activou o Plan Transgal (Plan Especial de Protección Civil fronte a emerxencias por accidentes no transporte de mercadorías perigosas). O motivo da activación deste Plan foi a colisión entre dous camións que circulaban pola LU-651, á altura de Vilamor, no concello lucense de Folgoso do Courel, onde un dos vehículos, o de transporte de alimentación, caeu por un terraplén resultando ileso o seu condutor.
Segundo informou o persoal da empresa á que pertence o camión de explosivos sinistrado, a carga non sufriu danos, polo que, a situación está totalmente controlada.
Tras poñer en marcha o dispositivo de intervención, nada mais recibir a chamada dun particular sobre as 11:00 horas, os xestores do 112 Galicia pasaron aviso de inmediato ao Servizo de Urxencias Sanitarias de Galicia-061, á Garda Civil de Tráfico, aos Bombeiros de Monforte e aos membros do GES da localidade. Así mesmo, foron informados os Bombeiros de Valdeorras e os efectivos de Protección Civil.
Unha vez controlada a situación, os axentes de Tráfico indicaron que o único ferido desprazouse polos seus propios medios ata o Centro de Saúde da localidade, así como, tamén os Bombeiros informaron que, en ningún momento, foi preciso interromper a circulación en dita estrada.
