Adif, a Xunta de Galicia e o Concello de Lugo acordaron hoxe en Madrid a construción dunha nova estación Intermodal na capital lucense, optimizando os prazos de construción e garantindo a explotación independente e eficaz das distintas instalacións e a óptima intermodalidade.
Para iso, as tres administracións asinarán proximamente un novo convenio, que adecuará e actualizará o protocolo de 2010, polo que posteriormente se adxudicou o proxecto á UTE Eptisa-Junquera Arquitectos, que concibía a estación como un único edificio sobre as vías, establecendo un esquema de usos apilados uns sobre outros (ferrocarril, autobús e aparcadoiro). Este proxecto establecía un esquema complexo de mobilidade entre os diferentes modos de transporte que dificultaría non só a construción senón a posterior explotación, de aí a necesidade da súa adecuación.
O convenio, do mesmo xeito que no resto de estacións intermodais galegas nas que xa se está traballando, establecerá claramente as responsabilidades de cada unha das administracións e a forma de financiamento das distintas actuacións.
Así, Adif comprometeuse a elaborar un anteproxecto único para a nova estación intermodal, así como a licitar un novo proxecto construtivo para a estación ferroviaria desde a fase de estudos previos, incluíndo a súa correspondente tramitación ambiental, e a súa coordinación cun proxecto de nova estación de autobús independente, a desenvolver pola Xunta de Galicia.
A nova proposta de estación intermodal permitirá acometer de maneira independente e por separado as diversas actuacións incluídas (estación de ferrocarril, estación de autobuses e aparcadoiro de vehículos), sen necesidade de que ambas as estacións formen parte do mesmo edificio. Desta forma, garántese a construción e o funcionamento independente de ambas as instalacións, asegurando a intermodalidade mediante percorridos curtos e ao mesmo nivel.
Ademais, dado que o anterior proxecto considérase dificilmente executable debido á imposibilidade de construír por separado as distintas actuacións que o compoñen e aos condicionantes económicos, Adif rescindirá o contrato (suspendido desde 2012) á UTE adxudicataria, co abono das indemnizacións correspondentes.
