Coincidindo co Día Mundial das Enfermidades Raras, o centro comercial As Termas colabora este sábado, 28 de febreiro, coa Federación Galega de Enfermidades Raras e Crónicas, co fin de informar e recadar fondos, para a investigación e axuda ás persoas que conviven con estas patoloxías.
Durante todo o día de mañá instalarase na planta baixa do centro unha mesa informativa e de colecta que poderá visitarse entre as dez da mañá e as dez da noite.
O obxectivo desta campaña é dar visibilidade e recadar fondos que axuden por unha parte, a manter os servizos sociosanitarios que se ofrecen dende a asociación, e por outra, a de financiar proxectos de investigación dun grupo de enfermidades que afectan a máis de 3 millóns de persoas en España. Calcúlase que en Galicia podería haber unhas 200.000 persoas afectadas por “enfermidades raras”.
