As empresas interesadas na contratación da desinsectación nos museos de San Paio de Narla e Pazo de Tor visitaron onte ditas instalacións para coñecer in situ os traballos que deben levarse a cabo neste patrimonio. Estes traballos enmárcanse nun plan integral, que inclúe actuacións nos propios edificios, salas de exposición e nas pezas, e que decidiu pór en marcha o Goberno da Deputación en xullo.
A Deputación tomou esta decisión tras constatar a necesidade de conservación deste patrimonio, tendo en conta que na última década non se tiñan executado de xeito integral estas actuacións, senón que se levaron a cabo intervencións parciais por coleccións. O Executivo deseñou e tramitou en tempo récord este contrato, publicado no BOP do 31 de xaneiro, dotándoo dun máximo de 72.625 euros. O prazo de presentación de ofertas remata o 15 de febreiro.
Estes traballos garantirán a eliminación de xilófagos, que son habituais na madeira, en todos os obxectos expostos, nos soportes expositivos e nas estruturas das edificacións; así como a conservación do conxunto das pezas, que suman 5.000 en San Paio de Narla e Pazo de Tor. O plan contempla a fumigación xeral dos edificios co obxectivo de controlar a posible aparición doutros insectos en materiais de orixe orgánica, como coiro, papel, tecidos ou fibras animais e vexetais.
En definitiva, trátase dun plan integral que contempla traballos de conservación preventiva en ambos museos, a través da desinsectación, un dos métodos máis eficaces de conservación das coleccións. Cómpre sinalar que a última vez que se puxo en marcha un plan destas características, é dicir, completo ou integral, foi no ano 2002, no caso de San Paio de Narla; mentres que no Pazo de Tor fíxose en 2005. Entre tanto, leváronse a cabo intervencións parciais, por coleccións.
Aprobación e prazos
A Xunta de Goberno da Deputación aprobou na sesión do 20 de xaneiro o prego de cláusulas administrativas e prescricións técnicas; este, rexe a contratación do servizo para a desinsectación integral de bens mobles e estrutura dos edificios dos museos Pazo de Tor e Torre-fortaleza de San Paio de Narla da Rede Museística Provincial, tal e como recolle o Boletín Oficial da Provincia do 31 de xaneiro.
