A asociación Lugo Monumental solicitou á Xunta de Galicia e ao Concello de Lugo que consensúen unha folla de ruta común para a estación de autobuses da cidade e a súa contorna, de cara á entrada en funcionamento da Intermodal.
Segundo indica o colectivo, desde que se puxo sobre a mesa o debate sobre o futuro desta infraestrutura xurdiron diversas propostas e xerouse un proceso de diálogo a nivel local que cualifican como enriquecedor.
En relación coa proposta do BNG de promover un referendo sobre esta cuestión, Lugo Monumental considera que se trata dunha iniciativa de interese, aínda que sinala que a decisión final debería basearse nunha análise detallada das necesidades, condicionantes, custos e posibles usos futuros do inmoble e do seu entorno. Neste sentido, apunta como alternativa a colaboración entre as administracións implicadas para establecer unhas bases comúns e a convocatoria dun concurso público de ideas con participación de profesionais.
Por outra banda, a asociación manifesta a súa preocupación ante a posibilidade de que o debate ou a posta en marcha dun concurso poidan atrasar a toma de decisións sobre o futuro da estación. Segundo advirte, esta situación podería derivar nun deterioro do edificio no caso de que deixe de estar en uso.
Mentres non se determine o destino definitivo do inmoble, Lugo Monumental propón manter a estación en funcionamento, aínda que sexa como parada intermedia de autobuses interurbanos e como punto de servizo para buses turísticos. A entidade considera que o custo de manter aberta a instalación sería limitado, ao restrinxirse á apertura básica do vestíbulo, das dársenas e dos establecementos en activo, o que contribuiría a evitar o deterioro asociado ao abandono de infraestruturas sen uso definido.
