A plataforma cidadá Transfuguismo Non, Democracia Si celebrou na tarde deste xoves unha nova concentración en Lugo para expresar o seu rexeitamento á moción de censura no concello, que consideran un intento de alterar o resultado democrático saído das últimas eleccións municipais.
Durante o acto, trasladouse a preocupación e indignación dunha parte da veciñanza ante unha situación que, segundo indicou, “pon en cuestión a vontade expresada pola cidadanía nas urnas”. Os alí presentes insistían na necesidade de respectar o mandato democrático derivado dos comicios locais, nos que as forzas que conforman o Goberno Municipal obtiveron a maioría suficiente para conformar goberno.
A plataforma defende a continuidade do actual executivo municipal, integrado por e considera que a estabilidade institucional resulta fundamental para garantir o desenvolvemento dos proxectos postos en marcha nos últimos anos.
Entre os aspectos destacados pola organización atópase a aposta por políticas de carácter social e medidas orientadas á mellora da calidade de vida da cidadanía, con especial atención aos colectivos máis vulnerables.
A concentración desenvolveuse nun ambiente reivindicativo e reuniu a diferentes persoas e colectivos que amosaron o seu apoio á defensa da estabilidade política municipal e ao respecto polos resultados electorais. Desde a plataforma anunciaron que continuarán promovendo mobilizacións e accións públicas para visibilizar a súa posición e reclamar transparencia e respecto polo funcionamento democrático das institucións.
