O Centro de Artesanía e Deseño dependente da Deputación Provincial, acollerá este xoves a partir das 19:00 horas, o concerto gratuíto Profunda amistad, do músico e compositor begontino Adrián Vigo.
Este espectáculo musical é un paso máis na traxectoria deste chairego que nesta ocasión, ofrecerá interpretacións alonxadas das que normalmente adoita interpretar, decantándose pola música de baile.
“Música totalmente saída do corazón”, así define Adrián Vigo o seu primeiro traballo discográfico, que dá nome a este concerto, e que consta de 10 composicións propias en homenaxe a todos os que apoiaron ao compositor durante a súa andaina musical.
Profunda amistad engloba, entre outros estilos, baladas, ritmo pop-rock, bossanovas, e rumbas, onde predomina a voz e o piano. Acompañado polo mestre David Taboada, Adrián Vigo ofrecerá un concerto onde os asistentes poderán gozar da rumba “Unha sensación unida”, da balada “El corazón de una estrella” ou do vals “Davaine”, entre outros temas. A entrada é libre ata completar aforo.
